Mu gace ka Masaka mu Majyepfo ya Uganda, haravugwa inkuru idasanzwe y’umubyeyi witwa Glorious Betonde, w’imyaka 40, wibarutse abana batandatu b’impanga barimo abahungu batanu n’umukobwa umwe. Ni inkuru yakomeje gutangaza benshi haba mu gihugu cye no mu baturanyi, by’umwihariko abaturanyi n’umuryango we bayifashe nk’igitangaza cy’Imana.
Betonde yari asanzwe ari umubyeyi usanzwe utuye mu cyaro, utifashije cyane, ariko uzwiho kugira umutima mwiza no kuba umuntu wicisha bugufi. Avuga ko atigeze yifuza cyangwa ngo ateganye kwibaruka abana benshi icyarimwe, kuko no mu muryango we nta wigeze agira impanga. “Byari inzozi zitigeze zanyuramo. Ariko Imana yanshushanyirije indi nzira,” niko yabivuze aganira n’abanyamakuru.
Nk’uko bitangazwa n’abaganga bo ku bitaro bya Masaka Regional Referral Hospital, aho yabyariye, abana bose bavutse bafite ubuzima buzira umuze, n’ubwo batagejeje igihe cy’amezi 9 nk’uko bisanzwe ku bana bavutse mu buryo busanzwe. Ubuyobozi bw’ibi bitaro buvuga ko bagiye gufasha uyu mubyeyi kugira ngo abana bitabweho byihariye, dore ko bavutse bacyenewe inkunga yihariye mu minsi ya mbere.
Glorious Betonde yasobanuye ko atigeze agira ibimenyetso byihariye ko atwite impanga nyinshi, uretse uko inda ye yakomeje gukura ku muvuduko utangaje. “Natekerezaga ko nshobora kubyarira rimwe abana babiri cyangwa batatu, ariko sinigeze nibwira ko ari batandatu,” avuga atuje ariko yishimye.
Umugabo we, Joseph Ssemwogerere, na we yavuze ko n’ubwo bishimishije, iyi nkuru yabateye ubwoba kuko umuryango wabo udafite ubushobozi bwo kwita ku bana batandatu icyarimwe. Yagize ati: “Twishimiye abana bacu, ariko twizeye ko Leta n’abandi bagira umutima wo gufasha bazatuba hafi.”
Bamwe mu baturage bo mu gace ka Betonde bavuze ko iyi ari “inkuru y’igitangaza” bagize mu myaka myinshi ishize. Hari n’abemera ko ari ishimwe ry’Imana ryaje ku muryango wari umaze igihe kinini usaba urubyaro kuko mbere y’uko abyara, Glorious yari amaze imyaka 10 adasama.
Ubuyobozi bw’Akarere ka Masaka bwatangaje ko bugiye gukora ibishoboka byose kugira ngo uyu muryango ubone ubufasha, birimo ibiribwa, imyambaro y’abana, amata ndetse no gutekereza ku buryo bwo kubafasha kubona serivisi z’ubuvuzi ku buryo buhoraho.
Ni inkuru idasanzwe ishimangira ko ibitangaza bitarangira kandi ko umuryango, nubwo wahuye n’ihurizo rikomeye, ushobora gufashwa n’umuryango mugari w’abantu bafite umutima wo gufashwa.
About The Author
English