Mu Murenge wa Rurenge, Akarere ka Ngoma, haravugwa inkuru y’akarengane yagaragaye ku wa Mbere, tariki ya 5 Gicurasi 2025, aho inzego z’umutekano zasanze umuturage witwa Nkundumukiza Fiston afungiye mugenzi we mu nzu ye amaze iminsi ibiri.
Uwo yafunze, Niyibizi Célestin, bivugwa ko yari asanzwe amurimo amafaranga angana na 570,000 Frw. Nkundumukiza ngo yafashe icyemezo cyo kwihanira, amufungira mu nzu aho yamukomanyirije atabasha gusohoka. Ibi byabaye mu Kagari ka Akagarama, bikaba byaramenyekanye nyuma y’aho abaturanyi batangiye kugira amakenga ku mutuzo muke wagaragaraga muri urwo rugo.
Abashinzwe umutekano bageze aho byabereye basanze koko Niyibizi afungiye mu nzu, ndetse Nkundumukiza wari wamufunze yari yamaze gutoroka. Inzego z’umutekano zatangaje ko hafashwe ingamba zo kumushakisha kugira ngo ashyikirizwe ubutabera, mu gihe uwafunzwe yasabwe gutanga ikirego ku Rwego rw’Igihugu rushinzwe Ubugenzacyaha (RIB).
Ubuyobozi bw’Akarere ka Ngoma bwahise bugira inama abaturage yo kwirinda kwihanira, bubibutsa ko hari inzira zemewe z’amategeko zishobora kubafasha gukemura amakimbirane. Bwibukije ko kwihanira bishobora kugira ingaruka zikomeye ku mutekano w’abantu ndetse no ku bubasha bw’ubutabera mu gihugu.
Ibi bibaye mu gihe hirya no hino mu gihugu hakomeje kugaragara ibikorwa bidasanzwe bituruka ku makimbirane y’imyenda hagati y’abantu, bikagaragaza ko hakiri urugendo mu gushishikariza abaturage gukemura ibibazo binyuze mu nzira z’amategeko.
About The Author
English