Choir Horebu ikorera umurimo w’Imana mu itorero rya Adepr Kimihurura, riherereye mu mujyi wa Kigali, yasohoye indirimbo nshya bise ‘Yesu Niwe Zina,’
Yesu Niwe Zina,’ ni ndirimbo, ikubiyemo amagambo ashimangira ko izina rya Yesu ariryo risumba ayandi gukomera.
Iyi ndirimbo yamaze kugera ahagaragara ikomeje kwakirwa neza n’abakunzi ba Horebu Choir, ndetse n’abandi bakunda indirimbo zo kuramya no guhimbaza Imana. Ni indirimbo nziza ihamya ko izina rya Yesu ritanga ubuzima ku baryizera.
Batamuriza Consolee, niwe muyobozi wa Horebu Choir, yatangaje ko indirimbo ‘Niwe Zina’ ishingiye ku buhamya bw’ibitangaza bagiye babona mu buzima bwabo nk’abaririmbyi. Yagize ati: “Nka choir Horebu, turi ibihamya by’ibitangaza izina rya Yesu rikora mu buzima bwacu, haba mu bugingo ndetse no ku mubiri. Ibyo byose ni ho inganzo yo guhanga ituruka.”
Yakomeje agira at:” Dufite imishinga myinshi bari gukoraho muri uyu mwaka, igamije gukomeza kuzamura umurimo w’Imana. Muri iyo mishinga harimo gusohora izindi ndirimbo ziri gutunganywa muri studio, ndetse n’imyiteguro y’igitaramo gikomeye cyo kuramya no guhimbaza Imana twise ‘Urukundo rw’Imana Live Recording – Season 2.” Twatangiye imyiteguro y’iki giterane, cyane ko turi guteganya kuzagikora mu mpera z’uyu mwaka wa 2025.”
Korali Horebu kandi yaboneyeho gushimira abakunzi bayo badahwema kubagaragariza urukundo n’ubufatanye mu bikorwa byabo, babasaba gukomeza kubaba hafi, cyane cyane babasura ku mbuga nkoranyambaga zabo harimo YouTube, Instagram, Facebook ndetse na TikTok. Turabakunda cyane.”
Iyi korali yavutse mu mwaka w’ 1988, ivukira mu muryango w’umuririmbyi umwe wo muri iyi Korali. Icyo gihe iyi Korali yari igizwe n’ababyeyi n’abana, ariko nyuma yaje kwaguka. Mu bikorwa byunganira ivugabutumwa mu ndirimbo, iyi Korali ikora ibikorwa bitandukanye by’urukundo birimo gufasha abatishoboye ihereye ku baririmbyi bayo, kandi igashyingira abakoze ubukwe mu buryo bwiza, ndetse igatanga mituweli ku batazifite.
Choir Horebu, imaze kwihundagazaho abakunzi benshi bo hirya no hino ku isi, kubera ibihangano byabo ndetse n’ umurimo ukomeye Imana ikomeje kubakoresha. Bamaze gushyira hanze indirimbo zitandukanye nkarimo nk’ iyitwa; Amashimwe, Muzahabwa Imbaraga,Urukundo rw’Imana, Mbega Urukundo,Biratungana, Uwavuga Yesu, Niwe Zina, nizindi nyinshi… wazibona unyuze ku rubuga rwabo rwa YouTube rwitwa Horebu Choir-Adepr Kimihurura
.
About The Author
English