Kigali, 27 Kanama 2025 – Komite Nyobozi y’Igihugu ishinzwe gutegura Rwanda Shima Imana yatangaje ku mugaragaro ko igiterane cya 2025 kizizihizwa mu nsengero zose z’igihugu kuva ku wa Gatanu tariki ya 29 Kanama kugeza ku Cyumweru tariki ya 31 Kanama 2025.
Mu kiganiro n’itangazamakuru cyabereye i Kigali, Ambasaderi Prof. Charles Murigande, Umunyamabanga Mukuru w’Igihugu ushinzwe iki giterane, yasobanuye ko bahisemo kwimurira iki giterane mu nsengero zitandukanye aho kugiteraniriza hamwe ku kibuga nk’uko byari bisanzwe, kuko 95% by’Abanyarwanda bafite aho basengera. Ibi, ngo bizorohereza buri Munyarwanda kugera aho ari no gushimira Imana ku byiza yabakoreye nk’igihugu ndetse no mu buzima bwabo bwite.
Ku bijyanye n’abahanzi bazitabira Rwanda Shima Imana 2025, Amb. Murigande yavuze ko benshi muri bo basanzwe ari abanyetorero batandukanye. Bityo, kubera ko igiterane kitazabera ahantu hamwe, bazifatanya n’amatorero yabo aho bazayobora abitabiriye mu kuramya no guhimbaza Imana.
Uretse ibi bikorwa bizabera mu nsengero zose, hateganyijwe n’Igitaramo gikomeye cya Rwanda Shima Imana Concert kizahuriza hamwe abantu benshi, kikazanasakazwa ku bitangazamakuru bitandukanye kugira ngo Abanyarwanda bose bahurire hamwe mu gushimira Imana.
Pasiteri Jimmy Muyango, Umuyobozi w’Inama y’Ubutegetsi ya Peace Plan Rwanda, yagaragaje imwe mu mbogamizi ikiriho: gufasha Abanyarwanda bose kumva ko iki giterane ari icyabo, atari icy’itorero runaka cyangwa umupasiteri runaka.
Yagize ati: “Rwanda Shima Imana ntabwo yitwa Peace Plan Shima Imana, ntabwo yitwa Doctor Shima Imana, ntabwo yitwa Pastor Shima Imana. Yitwa Rwanda Shima Imana. Turashaka kugera aho buri Munyarwanda avuga ati: ‘Nanone nanjye nabonye iyi mpano; mfite impamvu nyinshi zo gushimira Imana.’”
Mu mpamvu zikomeye zagarutsweho harimo ubumwe bw’Abanyarwanda, umutekano w’igihugu, iterambere ry’ubukungu, izamuka ry’ingengo y’imari y’igihugu, ibikorwa remezo bigenda byiyongera, imiyoborere myiza, kwaguka kw’amashanyarazi, ikoranabuhanga n’itumanaho ryateye imbere, n’ibindi byinshi bigaragaza intambwe u Rwanda rumaze gutera.
Rwanda Shima Imana ni igiterane ngarukamwaka cy’igihugu cyose cyo gushimira Imana, cyabaye kimwe mu bikorwa by’ingenzi mu Rwanda. Icyabaye giheruka mu 2024 cyabereye kuri Stade Amahoro ku wa 29 Nzeri, gihuriza hamwe ibihumbi by’abitabiriye bishimye baririmbira Imana nubwo hari imvura nyinshi yagwaga.
Ni bwo bwa mbere cyari kibaye nyuma y’imyaka itanu, ariko byemejwe ko kizajya kiba buri mwaka. Igiterane cyo mu 2024 cyitabiriwe n’abayobozi mu nzego za Leta, abikorera, abayobozi b’amadini n’abaturage b’ingeri zose. Umushyitsi Mukuru yari Minisitiri w’Intebe, Dr. Edouard Ngirente.
Komite Nyobozi y’Igihugu yemeje ko Rwanda Shima Imana 2025 kizabera mu nsengero zose kugira ngo nta Munyarwanda ucikwe n’umwanya wo gushimira Imana. Ambasaderi Prof. Murigande yagaragaje ko impamvu zo gushimira Imana ari nyinshi kandi zidashidikanywaho, asaba buri wese kwitabira no gufata iki gikorwa nk’umwanya wo guhuza umutima n’abandi Banyarwanda mu gushimira Imana ku byo yakoreye igihugu.
About The Author
English