Itorero rya ADEPR Ruyenzi, ryo mu Karere ka Kamonyi mu Murenge wa Runda, riri kubaka urusengero rujyanye n’igihe ruzatwara Miliyari 1 y’amafaranga y’u Rwanda.
Uvuye ku muhanda munini wo ku Ruyenzi, urusengero ruherereye muri metero 300 werekeza mu muhanda wa Gihara. Inyubako iri kuzamurwa mu buryo bugezweho, igamije gutanga icyubahiro ku Mana no guha abakristo aho basengera hajyanye n’igihe.
Uyu mushinga wo kubaka uru rusengero umaze kugera kuri 60%. Biteganyijwe ko ruzuzura mu mpera za 2026, rutwaye asaga miliyari imwe y’amafaranga y’u Rwanda.
Nkuko bigaragara ku gishushanyo mbonera cy’uru Rusengero, kigaragaza ko izaba ari inyubako ndende kandi y’akataraboneka. Aho izajya yakira abantu barenga ibihumbi bibiri (2000) bicaye neza kandi mu mutuzo, nta kwireguza kuzahaba kubafite ibinyabiziga kubera ko iyi nyubako izaba ifite parikingi nini, ndetse n’umwanya uteguwe neza kandi ugezweho w’ahazashyirwa ibyuma by’amajwi (sound system) ku buryo buri jambo, indirimbo cyangwa ubuhamya bizajya byumvikana neza kuri buri wese.
Mu gishushanyo mbonera kandi, hagaragaramo intebe zigezweho kandi ziteye mu buryo buhoraho, ahantu hagutse imbere ndetse n’inyuma, n’ahazaba hatunganyijwe ubusitani buteye amabengeza.
Niyo Vincent umuhanzi, akaba n’umwe mubagize komite iri gukurikiranira hafi ibikorwa by’ubwubatsi kuri iri torero rya ADEPR Ruyenzi, yavuze ko uyu mushinga ari igikorwa cy’ukwizera, kandi ko buri mukristo afite amahirwe yo kugira uruhare muri uru rugendo.
Yagize ati“Ibi si iby’abasenga hano gusa, ni iby’abakunda Imana bose. Kubaka inzu yayo ni icyubahiro gikomeye. Umuntu wese uzashyiraho itafari, yaba mu buryo bw’amafaranga cyangwa amaboko, ari kwiyandikira umugisha mu ijuru.”
Yakomeje avuga ko hari benshi bamaze kwiyemeza gutanga umusanzu, abandi bagakora n’imirimo y’amaboko, ndetse anashishikariza abanyarwanda bose bafite umutima wo gukorera Imana kudasigara inyuma.
Komite y’ubwubatsi n’abayobozi b’Itorero batangaza ko uburyo bwo gutanga umusanzu bworoshye kandi bwizewe.
Aho abifuza gufasha no gutera inkunga uyu mushinga bashobora gukoresha ubu buryo bukurikira:
- Banki ya Kigali (BK): 00288-07755347-51 (INYUBAKO ADEPR RUYENZI)
- MTN MoMo: *182*8*1*607000# (INYUBAKO ADEPR RUYENZI)
Kubindi bisobanuro wahamagara:
Pastor Valens Usengimana (Umushumba w’itorero rya Adepr Ruyenzi) 0783020554
Jean Paul Umwanankundi (Umuyobozi wa komite y’inyubako) 0788457964
Jean Bosco Muhire (Ushinzwe imirimo y’ubwubatsi) 0783570133
Abayobozi b’Itorero basanga kubaka uru rusengero ari uburyo bwo kugaragaza urukundo n’umurava w’abizera.
“Ntihakwiye kugira uwo Imana izabaza impamvu atubatse. Ntawe uzabura amahirwe yo kugira uruhare muri iyi nyubako. Iyo dutanze, ntabwo dutakaza – ahubwo tuba dutera imbuto mu murima w’umugisha.”
Bashimangiye ko buri muntu wese utanga, yaba ari mu gihugu imbere cyangwa hanze yacyo, ari kwinjira mu isezerano ry’Imana rivuga ko “Imana idakiranirwa ngo yibagirwe imirimo yanyu n’urukundo mwerekanye mu izina ryayo” (Abaheburayo 6:10).
Uru rusengero rwa Ruyenzi ruje rwiyongera ku yandi menshi ADEPR iri kubaka hirya no hino mu gihugu, mu rugendo rwo kubaka insengero zijyanye n’igihe, zifite parikingi nini, ibyuma by’amajwi bisobanutse, n’uburyo bwo kwakira abakristo mu mutuzo.
Ubusanzwe ADEPR igaragaza ko iki ari igice cy’icyerekezo cyayo gishya cyo guhuza iterambere ry’umwuka n’iry’umubiri, igamije ko abizera basengera ahantu heza kandi hatuje, hakwiye Imana.
About The Author
English