Perezida wa Repubulika y’u Rwanda, Paul Kagame, yayoboye Inama ya 12 y’Ubutegetsi ya Smart Africa, yibanze ku ngingo z’ingenzi zirimo ubwenge buhangano (Artificial Intelligence) n’imirimo ikomeje gukorwa na Smart Africa Alliance mu guteza imbere ikoranabuhanga ku mugabane w’Afurika.
Inama yabereye i Conakry muri Guinea, yahurije hamwe abayobozi b’ibihugu, abashoramari n’inzobere mu ikoranabuhanga, bagamije kuganira ku buryo Afurika yakwihutisha impinduramatwara mu bukungu bushingiye ku ikoranabuhanga.
Mu ijambo rye, Perezida Kagame yashimangiye ko ubufatanye hagati ya za Guverinoma, inganda, amashuri n’abafatanyabikorwa mu iterambere ari bwo shingiro ry’iterambere rya Afurika. Yavuze ko kudindira kwa buri gikorwa gifitanye isano n’iri terambere kigira ingaruka kuri Afurika yose, asaba ko hakomezwa gushyirwamo imbaraga kugira ngo ibyo byiyemejwe bishyirwe mu bikorwa.
Perezida Kagame yagize ati: “Reka dukomeze dushyire hamwe.”
Yakomeje avuga ko igipimo nyacyo cy’iterambere kizagaragazwa n’ishyirwa mu bikorwa ry’imishinga yemejwe, kugira ngo Afurika ibone umusaruro ufatika uva mu ikoranabuhanga.
Ku ruhande rw’ibikorwa by’ubukerarugendo n’udushya mu ikoranabuhanga, Perezida Kagame na mugenzi we wa Guinea, Gen Mamadi Doumbouya, basuye ahamurikiwe ibikorwa u Rwanda rwahanze mu ikoranabuhanga, mu rwego rwo kugaragaza intambwe rumaze gutera muri urwo rwego.
Ku wa 12 Ukwakira 2025, Perezida Kagame yifatanyije na Perezida Doumbouya mu muhango wo gutangiza Inama Mpuzamahanga yo Guteza Imbere Ikoranabuhanga muri Afurika – Transform Africa Summit 2025 (TAS 2025), yabereye muri Guinea.
Ni inama yahurije hamwe abayobozi b’ibihugu, abashoramari n’inzobere mu by’ikoranabuhanga baturutse impande zose z’Afurika, igamije kungurana ibitekerezo no gushakira hamwe ibisubizo by’ubukungu bushingiye ku ikoranabuhanga.
Perezida Kagame yavuze ko hashize imyaka irenga icumi iyi nama itangijwe bwa mbere i Kigali, mu gihe Isi yose yari itangiye impinduramatwara y’ikoranabuhanga, ashimangira ko u Rwanda rwabonye amahirwe yo kubaka urwego rukomeye rw’ikoranabuhanga ruri gufasha igihugu n’umugabane wose muri rusange.
Transform Africa Summit: Urubuga rw’iterambere ry’ikoranabuhanga muri Afurika
Transform Africa Summit 2025 ikomeje kugaragara nk’urubuga rukomeye rwo kungurana ibitekerezo, gusangira ubunararibonye no guteza imbere ubukungu bw’Afurika binyuze mu ikoreshwa rinoze ry’ikoranabuhanga.
About The Author
English