Korali Havilah ibarizwa ku mudugudu wa ADEPR Kumukenke, ikomeje kwandika amateka mu murimo w’Imana, igiye gukora igitaramo cyayo cya mbere cyateguwe ku rwego ruhanitse, giteganyijwe kuba ku wa 22 Ugushyingo 2025 guhera saa munani (2:00 PM) kuri Dove Hotel – Gisozi.
Iki gitaramo cyiswe “Imigambi y’Uwiteka Live Concert”, gishingiye ku ijambo ry’Imana riboneka muri Yeremiya 29:11, rigira riti:
“Erega nzi ibyo nibwira nzabagirira ni amahoro si ibi bi, kugira ngo mbarememo umutima wibyo muzabona hanyuma. Ni ko Uwiteka avuga.”
Amateka ya Korali Havilar, kuva ku baririmbyi 7 kugera ku rwego rukomeye igezeho.
Mu kiganiro Kigali Connect yagiranye na HABINEZA Augustin, umwe mu bayobozi biyi Korali, akaba ari nawe wabaye Perezida wayo wa mbere ubwo yatangiraga muri 2000, yasobanuye urugendo rutoroshye korali yanyuzemo:
Yagize ati”Twatangiye turi abaririmbyi barindwi (7), ntabyuma byo gucuranga twagiraga, twavuzaga ingoma y’uruhu. Twatangiriye ku mudugudu mushya, icyo gihe hari na Korali Siloam. Twari dufite ubukene cyane, abagabo bo kuririmba twarababuze, ku buryo kubabona twabifatiye amasengesho yihariye. Icyo dushimira Imana ni uko yatubwiraga ko tuzaguka, kandi koko twaragutse nubwo twanyuze mu bizazo byinshi.”
Yavuze kandi ko korali yahinduye imyirondoro, ikava ku izina Herumoni ikitwa Havilah, mu bihe bitoroshye, Imana yakomeje kwigaragaza binyuze mu mbaraga zayo n’umurimo w’abaririmbyi bihambiriye ku isezerano.
Korali Havilah yahaye Siloam icyubahiro cyihariye.
Mu gusobanura impamvu Siloam Choir yatoranyijwe mu bazafatanya muri iki gitaramo, HABINEZA Augustin yagize ati:
“Korali Siloam twavutse ireba, kandi turaziranye cyane. Yigeze gukora igiterane muri Dove Hotel natwe iduha umwanya wo gukorana nayo, ku buryo muri iki gitaramo, twakoreyemo indirimbo zacu enye (4). Ibyo byadukoze ku mutima cyane, niyo mpamvu twumvise ko mu giterane cyacu natwe tugomba kubana nabo nk’abakuru bacu. Tubanye neza kandi dukorera umurimo ku itorero rimwe.
Muri iki gitaramo, hazigisha Rev. Pst. Valentin Rurangwa, umwe mu bakozi b’Imana bakomeye, kandi Imana iri gukoresha ibikomeye muri iki gihe, aho benshi bakomeje guhindurwa n’ubutumwa bwiza Imana yashyize muri we.
HABINEZA Augustin avuga ku bijyanye nuko biyumva ku kuba bagiye gukora iki gitaramo yagize ati” Kuba tugiye gukora igitaramo cyacu cya mbere, bivuze imbaraga zikomeye z’Imana n’amateka Imana yongeye guhindura kuri twebwe. Byongeyeho kandi Dove Hotel twayisengeyemo cyane none tuyikoreyemo n’indirimbo zacu bwa mbere.
Kugeza ubu Korali Havilah iyobowe na Etienne MUJYAMBERE, umaze igihe ayobora uyu muryango w’abaririmbyi mu mbaraga zidasanzwe, aharanira ko korali ikomeza kwaguka no gushyira imbere umurimo wo kuramya no guhimbaza Imana mu rwego rwisumbuye. Abagize korali bavuga ko imbaraga, icyerekezo n’ubwitange bwe biri mu byatumye korali igera ku rwego iriho muri iki gihe.
Ni igitaramo cyitezweho kwerekana imbaraga z’Imana ndetse n’aho yakuye Havilah Choir kugeza ubu.
Korali Havilar yamenyekanye cyane mu ndirimbo bise “ITSINZI TURAYIZEYE” imaze kurebwa n’abarenga ibihumbi 400 ku rubuga rwabo rwa YouTube. Bazwi ku zindi ndirimbo zitandukanye zirimo Umusaraba wa Yesu, Kuko izantabara, Dufite Imana, nizindi…
About The Author
English