Umugaba Mukuru w’Ingabo z’u Burusiya, Valery Gerasimov, yatangaje ko ingabo z’icyo gihugu zigaruriye uduce 32 mu kwezi k’Ukuboza mu ntambara zihanganyemo n’ingabo za Ukraine.
Ibi yabitangaje kuri uyu wa Mbere mu nama Perezida w’u Burusiya, Vladimir Putin, yagiranye n’abayobozi bakuru b’ingabo z’igihugu, barimo Minisitiri w’Ingabo, Andrey Belousov n’abayobora imitwe y’ingabo ziri ku rugamba.
Gerasimov yatangaje ko mu Ukuboza, Ingabo z’u Burusiya zigaruriye ubuso burenga kilometero kare 700, zitangira kugenzura uduce 32 turi mu maboko yazo.
Yongeyeho ko muri uku kwezi ingabo zakoranye imbaraga zidasanzwe kurusha ibindi bihe muri uyu mwaka, kandi ko zikomeje kunesha umwanzi ku rugamba.
Yagize ati “Umwanzi nta gikorwa gikomeye cyo kudusatira ari gukora. Bashyize imbaraga nyinshi mu gukaza ubwirinzi bwabo no kugerageza kugabanya umuvuduko wacu bari kugaba ibitero byo kwangiza ibikorwa byihariye ndetse no gukoresha indege zitagira abapilote (drones) ku rugero rwo hejuru.”
Perezida Putin yashimiye ibikorwa by’ingabo zabo ku rugamba, azishimira umurava wazo mu guhangana n’umwanzi.
Ati “Nta gushidikanya, intsinzi y’Ingabo z’u Burusiya zabohoye Donbass, zikagaragaza umurava n’ubutwari buri munsi ari na ko zishyira ubuzima bwazo mu kaga.”
Intambara y’u Burusiya na Ukraine yatangiye muri Gashyantare 2022, ndetse ubu hari gushakwa uko ibiganiro byatangijwe na Amerika byazavamo umuti urambye wo kuyihagarika.
About the Author
