“Sénégal: Abantu 12 Bafunzwe Bakekwaho Kuryamana n’Abo Bahuje Igitsina”

Umuryango uharanira uburenganzira bw’abantu baryamana bahuje ibitsina, Stop Homophobie, wamaganye icyemezo cya Leta ya Sénégal cyo guta muri yombi abantu 12 bakekwaho kuryamana n’abo bahuje ibitsina. Muri abo harimo Pape Cheikh Diallo, umushyushyarugamba ukorera Télé Futurs Médias (TFM), ndetse n’umuririmbyi Djiby Dramé.

Sénégal ni igihugu gituwe cyane n’abayoboke b’idini ya Islam, kandi amategeko yacyo ahana ibikorwa by’imibonano mpuzabitsina bikorwa hagati y’abantu bahuje igitsina. Ibyo bikorwa bihanishwa igifungo kuva ku mwaka umwe kugeza kuri itanu.

Ku wa 7 Gashyantare, Polisi ya Sénégal yatangaje ko yataye muri yombi abantu 12, ibashinja gukora “ibikorwa binyuranyije n’imiterere karemano, gukwirakwiza ubwandu bw’agakoko gatera SIDA binyuze mu mibonano mpuzabitsina idakingiye, no gushyira mu byago ubuzima bw’abandi.”

Umuryango Stop Homophobie, uharanira kurwanya ivangura rishingiye ku gitsina no ku myitwarire y’imibonano mpuzabitsina muri Sénégal, wabwiye ikigo cy’itangazamakuru AFP ko wamagana ibi bikorwa, uvuga ko bibuza abantu bakuru bakora imibonano mpuzabitsina yumvikanyweho, kandi bigashyira mu kaga uburenganzira n’umutekano w’abantu bo mu muryango wa LGBTQA+.

Polisi ya Sénégal yatangaje ko umwe mu batawe muri yombi akekwaho kuryamana na mugenzi we batikingiye, kandi afite ubwandu bw’agakoko gatera SIDA, ibintu Polisi ivuga ko bishyira ubuzima bw’abandi mu kaga.

Ousmane Sonko, mbere yo kugera ku butegetsi ari mu batavuga rumwe na Leta, yakunze kuvuga ko bazaharanira guca ihohoterwa rikorerwa abaryamana bahuje ibitsina. Icyakora, akigera ku butegetsi, yatangaje ko ibyo yise “inkundura zituruka mu Burengerazuba bw’Isi ku byerekeye abaryamana bahuje ibitsina” ari intambara nshya igihugu cye kigomba kurwanya.

Mu mwaka wa 2023, amashusho yakwirakwiye ku mbuga nkoranyambaga agaragaza ibyavuzwe ko ari umurambo w’umugabo wataburuwe aho wari warashyinguye, bivugwa ko byatewe n’uko yaryamanaga n’abo bahuje igitsina. Ibyo byateje impagarara zikomeye mu gihugu, ndetse si ubwa mbere bene ibyo bikorwa bivugwa muri Sénégal.