Kuwa Kabiri tariki ya 6 Gicurasi 2025, hatangijwe ku mugaragaro uburyo bushya bwo kwishyura ubwishingizi bwa Mituweli, bukoresha amakuru ari muri Sisiteme y’Imibereho (Ubudehe Social Registry System), iyi ikaba yasimbuye uburyo bwari busanzwe bukoreshwa bushingiye ku byiciro by’Ubudehe.
Ni gahunda igamije gutanga serivisi zisobanutse, zinoze kandi ziciriritse, hagendewe ku makuru yizewe kandi agezweho y’imibereho y’umuturage. Ibi bikaba bigamije kwimakaza ubutabera n’uburinganire mu gutanga ubufasha bwa Leta binyuze muri Mituweli.
1. Ibintu by’ingenzi umuturage agomba kugenzura mbere yo kwishyura Mituweli
Mbere yo kwishyura Mituweli hifashishijwe ubu buryo bushya, umuturage asabwa kwitondera ibi bikurikira:
- Kugenzura ko amazina ye ari mu buryo bukwiye: Umuturage agomba kugenzura ko izina rye, iry’abagize umuryango we ndetse n’indangamuntu bihuye n’uko byanditse mu sisiteme ya NIDA.
- Kwemeza ko umubare w’abagize umuryango wanditse neza: Ni ingenzi ko umubare w’abagize urugo uri mu byanditswe neza, kuko bigira uruhare mu kubara umusanzu wishyurwa.
- Gusuzuma icyiciro cy’ubudehe yashyizweho na Sisiteme y’Imibereho: Umuturage akwiye kureba icyiciro arimo kugira ngo amenye uruhare rwe mu kwishyura, kuko buri cyiciro gifite umusanzu gitanga.
- Kwifashisha ubuyobozi bw’inzego z’ibanze mu gusobanukirwa amakuru: Niba hari amakuru adahuye n’ukuri cyangwa utayumva neza, umuturage asabwa kwegera ubuyobozi bw’akagari cyangwa umurenge kugira ngo ahabwe ibisobanuro birambuye kandi asabe gukosorerwa niba bikenewe.
- Kugenzura niba aherutse gufashwa muri gahunda za Leta: Aha harimo gufashwa mu bijyanye n’ingoboka cyangwa izindi gahunda za Leta, kuko ibyo nabyo bishobora kugira uruhare mu kumushyira mu cyiciro runaka.
2.Inyungu z’ubu buryo bushya
- Gushyira mu gaciro no gukumira uburiganya mu kwishyura Mituweli.
- Guhuza serivisi zitandukanye zishingiye ku mibereho y’abaturage.
- Gukoresha amakuru yizewe kandi agaragaza ukuri ku mibereho y’abaturage.
- Guhesha buri muturage amahirwe angana yo kubona ubufasha bukwiye.
Ubu buryo bushya bukomeje gushyirwa mu bikorwa buhoro buhoro mu gihugu hose, kandi abaturage barasabwa kwitabira no gutanga amakuru y’ukuri kugira ngo serivisi zibagenewe zibashe kubageraho uko bikwiye.
About The Author
English