Umuhanzi w’indirimbo zo kuramya no guhimbaza Imana, Iratwumva Gad, agiye gukora igitaramo cye cya mbere, yise Praise and Worship Live Concert.
Iki gitaramo kizabera kuri Dove Hotel i Gisozi, mu Mujyi wa Kigali, tariki ya 4 Gicurasi 2025, guhera saa munani z’amanywa (2:00PM). Ni igitaramo gifite intego yo kugaragaza urukundo rw’Imana binyuze mu ndirimbo, no gufasha abantu kwegera Imana mu mwuka no mu kuri.
Umwihariko w’igitaramo
Iki gitaramo kizaba kirimo umwihariko w’indirimbo zifite intego yo kuramya no guhimbaza Imana, ndetse n’ijambo ry’Imana rizigishwa ku buntu. Hazitabira amatsinda akomeye arimo Simuruna Choir (ADEPR Kiyovu) na The Light Worship Team, bazaririmba mu buryo bwa “live” imbere y’abazitabira.
Umwigisha w’Ijambo ry’Imana
M. Joselyne, umukobwa wamenyekanye cyane mu ivugabutumwa rifite imbaraga, ni we watumiwe nk’umwigisha w’Ijambo ry’Imana muri iki gitaramo. Azafasha abitabiriye gusobanukirwa n’urukundo rwa Kristo no gukomeza urugendo rwabo rwo kwizera.
Inkomoko n’ihamagarwa bya Iratwumva Gad
Mu kiganiro yagiranye na Kigali Connect, Gad yagaragaje ko yatangiye urugendo rwe rw’umuziki akiri muto. Yavukiye mu muryango w’Abakristo, aho se yari umupasiteri. Yatangiye kuririmba muri korali y’abana, akomeza no mu mashuri yisumbuye kugeza ageze muri korali y’abantu bakuru. Aho hose yagaragaje ko kuririmba ari impano yihariye yahawe n’Imana.
Yagize ati:
“Iyo ndi kuririmba numva ntuje kandi mfite amahoro. Ni umurimo numva unshimisha kuko wubaka imitima y’abantu n’ubwami bw’Imana.”
Gutegura iki gitaramo
Gad yavuze ko hashize igihe, yifuza gukora iki gitaramo ariko ubushobozi n’igihe byamugoraga. Nyuma yo gusenga no kubona ibimenyetso by’uko igihe kigeze, yemeje gukora igitaramo cye cya mbere, yizeye ko ari intangiriro y’urugendo rushya nk’umuhanzi wigenga.
Iki gitaramo kizaba n’umwanya wo kumurika indirimbo ze nshya bwite, kuko kugeza ubu azwi cyane mu ndirimbo za “cover”. Ni intambwe nshya mu buzima bwe bw’umuziki, aho yifuza kujya ahimba no gusohora ibihangano by’umwimerere bifite ubutumwa bukomeye.
Indoto no kureba kure
Iratwumva Gad afite intego yo guteza imbere umuziki wa Gospel ku rwego rwo hejuru, haba mu Rwanda, muri Afurika ndetse no ku isi. Yifuza gukorana n’abandi bahanzi bafite indangagaciro zihamye kugira ngo bashyire hamwe mu kwagura ivugabutumwa rinyuze mu ndirimbo.
Yagize ati:
“Ndashaka gukora Gospel ijyanye n’igihe ariko igakomeza kuba ishingiye ku kuri kw’Ijambo ry’Imana. Nifuza kuririmbira abantu benshi kugira ngo bagire amahirwe yo kwakira Kristo.”
Abo afata nk’icyitegererezo
Mu bahanzi bamuhaye icyerekezo, yavuze ko Chryso Ndasingwa ari umwe mu bamwigisha byinshi binyuze mu bihangano bye. Yatangajwe cyane n’uburyo Chryso afite ukwizera gukomeye n’ubutumwa burimo ubuzima bwo kwizera bukomeye.
Yagize ati:
“Ndifuza kugira umutima n’ubuhanga nk’ubwa Chryso Ndasingwa. Indirimbo ze zubaka cyane.”
Ubutumire ku Banyarwanda
Gad yasabye abakunzi b’umuziki wa Gospel, abaturarwanda n’abandi bose bafite inyota yo kuramya Imana, kuza kumushyigikira no kwifatanya na we kuri uwo munsi. Kwinjira ni ubuntu, imiryango izaba ifunguye saa munani z’amanywa.
Amakuru y’ingenzi y’igitaramo
• Itariki: Ku wa 4 Gicurasi 2025
• Aho kizabera: Dove Hotel – Gisozi
• Isaha: Guhera saa 2:00 PM
• Kwinjira: Ubuntu (Free Entrance)
• Abazaririmba: Simuruna Choir, The Light Worship Team
• Ijambo ry’Imana: MUKATETE Joselyne
Iki gitaramo ni amahirwe ku bakunda guhimbaza Imana binyuze mu muziki, kandi ni urugendo rushya rw’umuhanzi wifuza kubaka no kugeza ubutumwa bwa Yesu ku bantu bose.
Umwanditsi wa Zaburi 28:7 UWITEKA ni we mbaraga zange n’ingabo inkingira, Umutima wange ujya umwiringira ngatabarwa. Nicyo gituma Umutima wange wishima cyane, kandi nzamushimisha indirimbo yange.
About The Author
English