Umuhanzi Baba Sol Yasohoye Indirimbo Nshya yise “Far Away”

Umuhanzi nyarwanda Baba Sol, uzwiho impano idasanzwe mu kuririmba no guhanga indirimbo zifite ubutumwa, kuri uyu wa Mbere tariki ya 26 Mutarama 2026, yashyize hanze amashusho y’indirimbo ye nshya yise “Far Away”.

Iyi ndirimbo yakiriwe neza n’abakunzi ba muzika nyarwanda, by’umwihariko abafana ba Baba Sol, dore ko yari amaze igihe kigera ku mwaka umwe adasohora indirimbo nshya.

Mu ndirimbo “Far Away”, Baba Sol agaragaza inkuru y’urukundo rw’umuntu uri kure y’uwo akunda, ariko umutima we ugakomeza kuguma hafi ye. Ubutumwa bwayo bushimangira ko urukundo nyarwo rutagengwa n’intera, ahubwo rushingira ku kwihangana, icyizere ndetse n’amarangamutima akomeye ahuza abakundana n’ubwo baba batandukanye n’aho bari.

Iyi ndirimbo yanditswe na Baba Sol afatanyije na KEN UMU, mu gihe amajwi yayo yatunganyijwe na Winner TunePlanet. Amashusho yayo yakozwe na Director XD, atunganywa mu mabara (Color Correction) na Sinta Films. Umukobwa wagaragaye muri video (Vixen) ni B Milly, mu gihe umushinga wose wari uhagarariwe n’ubuyobozi bwa The Vibes Record nka Executive Producer.

“Far Away” yiyongereye ku zindi ndirimbo za Baba Sol zakunzwe cyane zirimo Away, Move, Uhumirije na Warankunze. Iyi ndirimbo nshya ikomeje kugaragaza ko Baba Sol ari umuhanzi ufite ubuhanga kandi utanga icyizere kuri muzika Nyarwanda.

Indirimbo “Far Away” wayibona unyuze ku rubuga rwe rwa YouTube rwitwa – Baba Sol, cyangwa ukayumva unyuze hano hasi.